لويېږي بې طرفه، چې بېواکه مې گامونه دي

لويېږي بې طرفه، چې بېواکه مې گامونه دي

دا د څه نشه ده که مې غړند مرامونه دي

نشته هغه سترگې تصور به څه ځلا و کا

ست د مستۍ نه کا که پيالۍ دي که جامونه دي

مړه به څه جواب کوي، کوه ور سره څه چې کړې

تا چې د ژوندون پرې لگوي الزامونه دي

زه چې له خيالي جهانه والوتمه پورته شوم

دلته خو يو زه يم نه دانه شته نه دامونه دي

اوس به په لټون يم د پښتون چې را بيدار يې کړم

ورک زما له مخې د انسان واړه قامونه دي

راز يې په کثرت کې د وحدت، له يوه کيف وموند

بس يوه هوا ده بې شماره يې بامونه دي

کوم خوا ته چې لاړم هغه تور دمحبت يمه

خلقو راته تل کړي له ورايه سلامونه دي

راشه که مې سر درته ټيټ نه شي پښتون هوډ لري

سترگو کې مې جمع درته ډېر احترامونه دي

ستا په هر انداز کې حمزه راز د ژوندون وموندو

ستا په هر يو ناز کې نوي نوي الهامونه دي