مه غولېږئ

وينا ته چې يې گورې - د وطن په غم جلبل دی

پرې مه غولېږئ غل دی

په ژبه هر څه وايي - وطن اوملت ستايي

په دې غم مبتلا يې

د خپل مطلب د پاره - هر ځای ته لري لاره

تل گرځي ناقراره

له خپل شخصي غرض نه - نه تېرېږي گوډ او شل دی

پرې مه غولېږئ غل دی

شپويې که په سروي- په غاړه يې کالر وي

په پوهه معتبر وي

په بدنظر يې گوری- که يې بل شانې عمل دی

پرې مه غولېږئ غل دی

په بڼه د انسان دی - په خوله ښه مسلمان دی

په خوی لکه شيطان دی

عمل باندې تک تور دی- که په سر يې سپين ململ دی

پرې مه غولېږئ غل دی

لږ ځير شئ حقيقت ته- عمل خوی او خصلت ته

د هر چا هويت ته

مشکل يې پېژندل دی - د ټگانو بل شان پل دی

پرې مه غولېږئ غل دی

هر وخت کښې منافق شته - په هر ځای کښې فاسق شته

هم نېک او هم صادق شته

هغه به نه غولېږي - چې په عقل مکمل دی

پرې مه غولېږئ غل دی