مات بتان

ښه سو چي غټ بتان راپرځېدل

ښه سو چي ړنګي سولې دنګي ماڼۍ

ښه سو ، چي وګړېدې ګونګي ژبي

له لاسو ولوېدلې توري کړۍ

د سمندر څنډي ته ووتلې

د زمانې سېلاب اخيستې بېړۍ

سترګو کي وځلېدې وړانګي د ژوند

هېري سوې تېري توپاني شوګيرۍ

ښه سو چي ورژېدې لويي داړي

ښه سو چي وسپړېدل پټ رازونه

نور به تياره کي د لېوه انګولا

نه کړي حرام د چا آرام خوبونه

نور به د شپې د ماشومانو سره

نه وي د وهم او بلا نومونه

نور به د چا څپېړي نه شنه کوي

د چا ګرېوان يا د ابا مخونه