مينه نوې نوې ښکاري درنه غواړې ارمان نوی

مينه نوې نوې ښکاري درنه غواړې ارمان نوی

د زړې قصې د پاره منتخب کړه عنوان نوی

ځه ورځه په خپله مخه غلچکيه وخته لاړ شه

ستا که نوکې پخوانۍ دي ما جوړ کړی گرېوان نوی

که ناپوهه زمانې کړل حوادث درته پلکونه

مسلمانه پاڅه جوړ کړه د خپل زړه نه سندان نوی

د ضمير د ژوند نبضونه کله نېغ کله کاږه شي

مرض هغه پخوانی دی پرې راغلی بحران نوی

لا په هغه زوړ گرداب کې دملت جهاز حصار دی

حجازي بادونو راشئ راپيدا کړئ طوفان نوی

جنس د امن ختم شوی په بازار دعالم دی

هغه زوړ مسلمان څه شو چې راجوړ کړي کاروان نوی

چې رڼا يې په څېره کې د اسلام د تهذيب نه و ي

زما څه پرې که دا وران شي بل ودان شي جهان نوی

د پرون د قدم نخښه افسانه د سبا څه زده

بوږنېدلی نن مې غواړي يو موسکی اطمينان نوی

نه لرمه امتياز او نه په ژبه کې زور پاتې

د وختونو سترگې برندې د حالاتو زبان نوی

د فطرت کږلېچ خو گوره چې هم هغه زوړ مضمون دی

پرې پتنگ يم خو چې وي يې څه انداز د بيان نوی

نوي هېڅ په جهان نشته خو مونږ ورکړو لباس نوی

نه لباس د فطرت زوړ شو ، نه پيدا شو انسان نوی

غرېو نيولې بړبوکۍ مې د ملت په ورانېدو ده

بيابان په ختمېدو دی خدايه بل بيابان نوی

دمذهب د ازاديه حمزه! څه درته حاصل شو

خو بس دا په زوړ زندان دې غوره کړی زندان نوی