ملي حماسه

پخوا به په وطن خلکو سرونه ورکول

سرتېرونه يې زړونو کښې ځايونه ورکول

مېړانه سرښندنه وه هنر د افغانانو

بې ننگو ته به هر چا پېغورونه ورکول

د ننگ غيرت خبروبه پيدا کړه طوفانونه

سړوسړو جذبونه ته يې تاوونه ورکول

ملي حماسه نه وه بې اثره بې تاثيره

ملالې چې ميوند کښې شعارونه ورکول

مؤمن ته د خدای نوم اسم اعظم ؤ په رښتيا

يو الله اکبر څه جرئتونه ورکول

مرگ نه و افتخارو د حق لار کښې شهادت

شهيد ته ښايسته حورو ډک جامونه ورکول

نن هغه قوت څه شو چېرته لاړه څنگه لاړه

فرنگ ته يې چې بيا بيا شکستونه ورکول

اوس مو کښې بدلون راغی او حالاتو کړو بدل مونږ

حالاتو ته په مونږ چې بدلونو نه ورکول

مضمون دآزادۍ زمونږ په سرو وينو رنگين و

زمونږ وينو تاريخ ته عنوانونه ورکول

په تورو، نه په تورو مونږ تعليم نوروته ورکړ

بې زړوته مو د ځان په شانې زړونه ورکول

مونږ هغه وخت مات کړی استعمار د پرنگيانو

چې نورو په دوه لاسو حراجونه ورکول

راځئ ! چې خلک جوړ کړو خلک به جوړ کاندی کارونه

په کار نه دی ناجوړو ته کارونه ورکول

څه خلکو کښې پيدا کړئ چې پخپله څه پيدا کړي

تر څو خوار و غريب ته خيراتو نه ورکول

اساس د ترقۍ او ډير مهم اصل يې بوله

اشخاصو ته اصلي شخصيتونه ورکول