ملت او مملکت

خوا په خوا غاړه په غاړه خوله په خوله وې

له يوې خاورې پيدا د يو کاله وې

له يوې ويالې او به ورته راتللې

په يوه هوا کښې ټولې لويېدلې

ددې ټولو يو خزان او يو بهار و

ښه او بد يې و شريک يو يې واکدارو

ځينې جگې ځينې ټيټې کوز و پاس وې

لکه گوتې د يوه وجود د لاس وې

چا مېوه لرله چا ښايسته گلونه

د چاسسيوري ؤ ډېر ښه د چاقدونه

چنار لوی و شفتالو لکه ماشوم و

دمڼې اوناک توپير له ورا معلوم و

له يوه سره لويي وه نور څه نه و

بل سره رنگونه ښه خوندونه ښه و

دمرغانو نغمې وې پکښې څو رازه

هر مرغه مو پېژانده له خپل اوازه

رنگا رنگ گلونه ويوه چمن کښې

لکه وي چې ولسونه په وطن کښې

هر يو بوټی پخپل ځای کښې سربلند و

د باغبان سترگو کښې هر يو ارجمند ؤ

په حقونو کښې يې نه وڅه توپير

ماليارو په هرې ونې ډېر زهير

يو له بله يې په هر حال کښې شرکت و

په تمامه معنی يو صحيح ملت و

لکه باغ يومملکت وگڼه وروره

پکښې هر قسم گلونه بوټی گوره

ونې ډېرې خو باغ يودی که پوهېږي

که کوې بل رنگه فکر ډېر غولېږي

ده سکه وروڼه لري بېل بېل نومونه

بېل رنگونه بېل غږونه بېل خويونه

مگر دواړه اوسېدونکی د يوکور وي

د يوې سترگې په کورکښې سپين او توروي