نوی گل

د حاکم نوم چې ولسوال شو تحول دي کنه

ددې ملې نهضت همدغه نوی گل دي کنه

ديموکراسي ده فرق د سپين او د تور نشته گورئ

نظر يې يو شان په سپين مخ او تور اور بل دي کنه

کله وي وار دا بې کله د ابا دلته

حق مساوي د گل آغا او بې بي گل دي کنه

د پرون کونډه که نن بيا په ډنگ وډول وېږي

که ابتکار نه وي نغمه او ساز خو بل دي کنه

د غرونو توردېوان يې واوروباندې سپين وښودل

تعجب مه کوئ بل ځای نه دي کابل دي کنه

جهل لوی عيب دي د عوامو نه د خاصو خلکو

د عارف جهل، جهل نه دي تجاهل دي کنه

د خوار غريب غفلت هرچاته څومره بد ښکاريږي

چې بد نه ښکاري د خوبانو تغافل دي کنه

ستا گناه نه ده ولسواله ملامت نه يې ته

دا چې په مونږ هر څه کوي زمونږ تحمل دي کنه

ته ديموکرات يې خوله تانه د کتاتور جوړول

د بل چا کار نه دي دا کار زمونږه خپل دي کنه