ورکه لار

چيرته درومي دا لار ورکي کاروانونه

دا پر تورو کږلېچونو ورک رغونه

چا کفن په غاړه کړى پکښي ناڅي

څوک پر خاورو تويوي ژوندوي جامونه

د کوثر له جامه څاڅي د اور څاڅکي

د دوزخ په لړمانه کي کوثرونه

پر هر موړ پر هر قدم بدنامي کندي

د ګناه په شعور روڼ دي خلوتونه

دا جرس به لا تر کومه په شرنګا وي

لا تر کله به وهي ستړي مزلونه

لا تر څو به دا مرموزه قافله وي

پى کوو به بې هدفه رباتونه

لا تر څو به دا رهزن کاروان سالار وي

چوروي به پر دې لار سر و مالونه