اوس له ډېرو ډېرو يوه پاتې ده چې زړه غواړي

اوس له ډېرو ډېرو يوه پاتې ده چې زړه غواړي

سخته تقاضا ده خو حال نه وايي چې څه غواړي

مينه پټېدی نه شي که څومره پټېده غواړي

حسن کې راښکته بې پناه ده چې کاته غواړي

زړه هغه ماشوم دی چې تر عمره هم ځوانېږي نه

کله کله هغه رانه غواړي چې يې نه غواړي

اوښکې ته زما دې عجيبه غوندې نظر وکړو

اوس نه دې باڼه نه په ستنه ځي، نه لوېده غواړي

نور ښکلي مې هم که زړه ته راشي اشنا څه وشول

پوه خو يې؟ حجره د پښتنو خو مېلمانه غواړي

تت کاته يې ورک کړه، برندې سترگې دې ورواړو

ښکليه آيينه زما د زړه درنه باڼه غواړي

بس چې مېن زړه مې دايره د مينې جوړه کا

ستا ددې ککيو د نقطې نه چورلېده غواړي

نن د سحر سترگې راته راز د مينې وښودو

زړه مې په ژړا ژړا کې ځکه موسېده غواړي

عکس د اشنا دې حمزه زړه ته رڼا راخو وړه

اوس چې ترې تصوير تياروې لږه تياره غواړي