اوس تپوس مې چې په وروځو کړې کامل شوې

اوس تپوس مې چې په وروځو کړې کامل شوې

جوړ په کار د تورو پوهه شوې قاتل شوې

ستا دمخ سختي وه پټه په ښکلا کې

له سپوږمۍ نه ايله گټې را حاصل شوې

په خندا خندا چې نن ترې انکاري يې

د ر اتلو وعده دې کړې وه قايل شوې

حسنه! ستا چې حقيقت وويني پوه شي

په زوال د خپل محل کله زايل شوې

زه خو تا وته حاصل وم له اوله

ښه خو دا شوله چې ته راته حاصل شوې

په کمال د تصور کې وحدت گوره

په صحرا کې بړبوکۍ راته محمل شوې

داسې ښکاري چې جوړ زه د تا منزل وم

ښکاره نه شولې چې ته زما منزل شوې

په دا سپک فطرت چې گډ شوې سيند دعشق ته

چپو يووړې لکه خلی په ساحل شوې

چې غندنه کړې زاهده گرم په دې يې

ميخانې نه چې خارج او نه داخل شوې

بل رقيب يې بې له تا نشته دی رشکه!

د حمزه او يار تر منځه چې حايل شوې