په ښکلا مين

څوک مين په ښکلا څوک مين په ښکلو

يو په خوله ترې اخلي خوند بل په کتلو

د چا برخه د ښکلا درک و احساس

د بل برخه وي جنسي دلک و تماس

يولېوال وي چې ترې واخلی خوند خلوت کښې

بل وي محوه په جمال د طبيعت کښې

محبوبه د هنرمند ښکلی معنا ده

معشوقه د بوالهوس پادر هوا ده

د چا سترگې څاري ستوری او سپوږمۍ

د چا برخه هوسو نه خرمستۍ

د يوه نظر په شکل او صورت وي

او د بل محبوب خپله محبت وي

ظاهربين په سپين پوستکی مينېږي

سطحي مينه ځي پوستکی ژر تورېږي

ښکلی دي فاني ښکلا ده بې زواله

بې نيازه له گاڼو له خط و خاله

د "الفت " محبوب عرض نه دی جوهر دی

په نظر کښې يې چې ښکلی دی هنر دی