په ږیره دبابا چې ماشومان لوبې کوي

خپه یم په مشرانو چې کشران لوبې کوي

په مدحه په ستایلو په بوټونو پاکولو

داخلق نن سبا په ولا شان لوبې کوي

چې هر طرف یې بیایي  په هماغه طرف درومي

په ځینو کاردارانو درباریان لوبې کوي

سپاره یې په اوږو شوه چې په دې فن کې استادؤ

واړه په لویو باندې دغه شان لوبې کوي

حاکمه خبر نه یې تاته څوک نه شي ویلې

په تا باندې څو تنه ملکان لوبې کوي

چې ساتي بیزو ګان او ټوله ورځ شادي بازي کا

ډیر ښه دي تر هغو چې په انسان لو بې کوي

که هر څه دې زړه غواړي  هغه کیږي چې پیسې وي

رشوت په رشوت خور باندې هر شان لوبې کوي

ما ولید مردار خور دی جګ مقام ته رسیدلې

د ستور  نشان یې واخیست په ډیر ان لوبې کوي

دغلو ملګري کیږي هغه وخت کې تمام خلق

دشاه په رعیت چې حاکمان لوبې کوي

هرڅه هلته بل شان وي حقیقت نه معلومیږي

په سترګو او نظر چې مداریان لو بې کوي

دمچ میږي کار نه دی چې به سره اور ځان ستي کا

په بلو لمبو باندې پتنګان لو بې کوي