په لېمو کې مې غړېږي د چا سترگې

په لېمو کې مې غړېږي د چا سترگې

چې کاته د مسيحا کړي زما سترگې

عشقه حسن دې فرېب ته نه رسېږي

چې دې زړه کوي خندا او ژړا سترگې

ستا د سترگو بلا واخلم داسې نشته

ما ليدلې په دنيا دي بلا سترگې

دا د چا يې شوخې سترگې دي ليدلې

چې کاته کړي وار خطا وار خطا سترگې

هر سبا د چا انجام ته اشاره ده

څه خو ما ته شه گويا د سبا سترگې

اوس کشتۍ دي د يقين د جواهرو

که پخوا مې دي کچکول د گدا سترگې

په ککو کې مې د شپو لکه ډيوې دي

دا محتاجې ستا د مخ د رڼا سترگې

ما حمزه ته به ويړيا وي د ويړيا نه

که مې واخلې د ديدن په بها سترگې