پالېسي

د غنا د تن جامه که مفلسي ده

د تقوی لباس کښې پټه ابليسي ده

دنيا دار که کله اغوندي خمتا

د روپيو اميانۍ هم کرباسي ده

په ظاهره که قاتل په مقتول ويرکا

مرثيه نه ده سندره حماسي ده

څه چې وايي ښه يې واوره باور مکړه

ته پوه نه يې د ده ژبه سياسي ده

نن په سر ځای درکوي سبا خپو لاندې

دغه ټيټ و پاس کېدل دپلوماسي ده

تملق په اخلاقي بڼه کښې وينم

اوس يې نوم قدرداني حق شناسي ده

ډېر کارونه په هغه خوله اجراء کېږي

چې يې کار قدمبوسيې کاسه لېسي ده

چې په ژبه يې څټې هغه يې خوښ وي

پالېسي يې په رښتيا چې پالېسي ده

داخلي سياست ډېر دی راټيټ شوی

زېربنا د لوړ مقام قدمبوسي ده

وايې وجه يې وجهه کې ده هر گوره

مؤثره علاقه خدايږوجنسی ده

مينو ژوب کښې چې بازار ته لوڅه اوزي

مه وايه چې يارانه يې لباسي ده

نامردان وايي مردۍ کښې مزه نشته

خوندوره غوښه گوره د خسي ده

په آغاز يې مه غولېږه انجام گوره

ماليدلی شهنامه د فردوسي ده

له ځايه ده راغلې دلته نه وه

دڅو ورځو مېلمنه ديموکراسي ده

حاکمان ولسوالان شوه نور څه غواړي

مونږ ته بس ديموکراسي نيمه سي سي ده

ولسواله! ستا په خوله به ټول عمل کا

اولسي جرگه بېشکه اولسي ده

که "الفت" ولاړ يوازې په ميدان دی

بېکسي ده هسې نه چې ناکسي ده