پټ شه نه پټېږي رانه اوس دهغې شپې نه پس

پټ شه نه پټېږي رانه اوس دهغې شپې نه پس

لاته راته ډېر يې بې حجابه د پردې نه پس

ته يې هم هغه خو په هر ځل راته بدل ښکارې

شوق د تماشې شي لاسوا دتماشې نه پس

ضبطه پسرلی چې را روان دی دا به څه کېږي

زور مې دخمار دی چې زياتېږي دتوبې نه پس

بېواکه مې سترگې شوې راډکې چې غوسه شوې ته

خشکې چينې تاندې شي اکثر د زلزلې نه پس

زړونه پرې آباد شول چې بهر يې ترېنه ووېستل

وگوره قسمت خو د بتانو دکعبې نه پس

ته لرې کېدلې چې څو څو په وړاندې تلمه زه

ځان ته به نزدې شومه د هرې مرحلې نه پس

ستا له ادا گانو ستا ښکلا ته رسېدلی يم

راغلم په نقطه کې، شومه ورک ددايرې نه پس

تاو د اننگونه دې چې زلفو ته په تېښته شوم

سيوري د ماښام ښه وي د ټکندې غرمې نه پس

ډېرو دروازو ته حمزه لاړو خو ناکامه شو

خير ورته چا ور نه کړو دتا د دروازې نه پس