پښتانه وايي

سرورکوو د خپل غرونو جگ سرونه ساتو

د احمدشاه ميرويس محمود درانه نومونه ساتو

مالونه نه ساتو ځان نه ساتو اولاد نه ساتو

له نورو خلقو د پښتون سيمه اوخونه ساتو

غواړو پښتو، پښتونستان د پښتنو د پاره

دتورې آب دخپل تاريخ لوړ عنوانو له ساتو

د ابراهيم خليل الله په دين ډېر کلک يو ولاړ

د قربانۍ د پاره مونږ خپل اولادونه ساتو

د پښتون خاورې ته مونږ گورو دناموس په نظر

لکه دخدای کور له اغيارو خپل کورونه ساتو

که جېلخانو کې څوک مېچنې گرزوي په مونږه

سل مشقته تېروو خپل ټينگ عزمونه ساتو

تر اوسه لا مونږ د خوشحال د ننگ سندرې وايو

تر اوسه لادده ديوان دده شعرونه ساتو

خټک لاشته دی او مغل شوه تورو خاورو لاندې

ظالمان ځي او مونږه خپل ملي حقونه ساتو

مونږ په پښتو او پښتنواله تل جنگونه کوو

د قام عزت د قام آبرو خپل وطنونه ساتو

زمونږ تيرا زمونږ خيبر زمونږ مهمند او وزير

مونږ او دوی ټول د پښتنو خپل بيرغونه ساتو

پښتون پښتون دی او پښتون به وي څو وی دا جهان

بل جامه کې سپک ښکارېږي پښتنو ته خپل ځان

پښتون هېڅکله باداري د چا منلی نه شي

ماچی ليدلی خو پښتون غلام کېدلی نه شي

چا چې عمرونه پخپل حق باندې جگړې کړی دی

د هغو خق په هېڅ قوت هېڅوک خوړلی نه شي

مخونه تور د پښتنو د دښمنانو وينم

هېڅوک پښتو او پښتنواله ورکولی نه شي

سند او پنجاب زمونږ ايستلی توری تل ليدلی

تاريخ شاهد دی او هېڅوک منکرېدلی نه شي

مونږ په ذلت خواری پنجاب ته کله تللی نه يو

په سپکه سترگه پنجابيان مونږ ته کتلی نه شي

دا غلط خيال دی چې پښتون به په پردو وپسې ځي

غلامان ځي مگر پښتون په دې لار تللی نه شي

په اسلامي سلوک پوهېږو بدسلوکه نه يو

خود اسلام په نامه څوک مونږ تېر ايستلی نه شي

د پښتون خير او سعادت غواړونور هېڅ نه غواړو

د عزيزانو بده ورځ هېڅوک ليدلی نه شي

راشی او حق ته غاړه کښېږدی عدالت ومنی

د پښتنو په حق پښې څوک اېښودلی نه شي

ظلم ښه نه دی په بل باندې تجاوز ښه نه دی

څوک په ناحقه د حق مخ کې درېدلی نه شي

مونږ پښتنو د پاره سم پښتونستان جوړوو

پاکستان وايي پښتنو نه پنجابيان جوړ وو

هېڅ امکان نه لري چې يو ملت له ځانه تېر شي

خپل هر څه پرېږدي له خپل نوم او له نښانه تېر شي

نه داسې شوی نه به وشي نه به وويني څوک

چې پښتانه پرېږدي پښتو او له افغانه تېر شي

بې غيرتي بې ايماني ده دپښتون په نظر

مکړه گان چې پښتانه به له ايمانه تېر شي

دخپل پردی تميز کوي دجهان ټول قومونه

پښتون به څنگه د پښتون له خاندانه تېر شي

له مليت نه تېرېدل دی له امکانه وتل

کيدونکی نه دی هغه کار چې له امکانه تېر شي

که پاکستان ورلره گوري د امکان په نظر

بايد چې دوی پخپله هم له پاکستانه تېر شي

حدود معلوم دی له خپل حده تېرېدل ښه نه دی

مري په دې لار کې سکندر چې له يونانه تېر شي

د سربازۍ لار کې مونږ ډېر امتحانونه ورکړه

وي آزموده څوک چې يو ځل له امتحانه تېر شي

مونږ ښه ملگری يوکه څوک په سمه لار شي روان

بې لارې خلق بدگڼو که له اسمانه تېر شي

زمونږ دوستان هغه کسان دی چې د حق په پلار کې

هسې قدم ناخلی چې دوی له خپل وجدانه تېر شي

خدايه! راټول کړې پښتانه په يوه نوم د پښتون

د اپرېدی، مهمند، وزير او نورو نشته بېلتون