عشق

عاشقانو سره ويره د سر نشته

هسې نه چې د عشق لار کښې خطر نشته

فرهادي عزم له عشقه پيدا کېږي

د عاشق په مخکښې هېڅکله غر نشته

کارغه نه رسي مقام ته د بلبلو

ورسره دعشق او ميني وزر نشته

عشق او مينې د بورا مينه گلزار کړه

سعادت ته بله لار د بشر نشته

د زاهد په امسا باندې جهاد نشي

غازي نه دی ورسره که خنجر نشته

دعاشق په برخه دار دی رسېدلی

د منصور جلوه په سر د منبر نشته

سربازی دعاشقانو لوی صفت دی

د خليل له سرو اورونو حذر نشته

په کوم ځای کې چې فرهاد او مجنون نه وي

هلته سترگې او صاحب دنظر نشته