څو که مې غم په انتها ښکاري

څو که مې غم په انتها ښکاري

لا دې کرم په ابتدا ښکاري

چين په جبين شې چې دې ستايمه زه

په هر انداز کې دې ريا ښکاري

چې په خندا کوې کلام را سره

لا مې دوران د ابتلا ښکاري

شندې راوشوې چې مېن شوم په تا

وهمي دنيا راته رښتيا ښکاري

دُر چې د اوښکو راوباسي د زړه

غم د پی مخو مرجوڼا ښکاري

سترگې له يو بلې پناه ښې دي

يو دي مېن که دوه جدا ښکاري

کم سنه وادې خلم د سترگو بلا

ډېرې اودې پکې بلا ښکاري

نم مې د زړه نه شو لېمو ته روان

راز دې په لاره د افشا ښکاري

د انتظار دې ځنکدن شو حمزه

ډيوه سلگۍ کوي سبا ښکاري