سپوږمۍ

د اسمان په زړه کې ځای دی تا نيولی

توره شپه دې په سپين مخ باندې رڼا ده

مخ د ځمکې دې تمام دی لټولی

په هر کور کې دی پرېوتې تجلی ده

ټول جهان دې په رڼا کې دی ليدلی

راته وايه چې په کوم کور کې ليلی ده

کوم چمن کې غوړېدلی دی گلونه

چا وهلی په لنډۍ زنه خالونه

ارمانونه، افسوسونه، حسرتونه

د مينو د غمجنو د خوارانو

غفلتونه ، لغزشونه، مکيزونه

د مشرانو د مستانو د خوبانو

چپاوونه، يرغلونه، شورشونه

د چنگېز د سکندر د پرنگيانو

دې هېواد کې تا ليدلی دغه واړه

ته د هرچا په سر باندې يې ولاړه

په کعبه او بتخانه کې ليدل کېږي

مسلمان گبر و تر سا سره آشنايې

هر يوه ته ډېره ښکلی معلومېږې

په رښتيا چې د تمام جهان ليلی يې

د اسمان زړه کې ايمان غوندې ځلېږې

د خدای کور دی دا جهان ته يې رڼا يې

چې له نازه چاته سم کله نه گوري

هغه سترگې منتظرې ستاپه لوری

ښه پوهېږم تا هم زړه په چا بايللی

ځکه غرونه او رغونه لټومې ته

داغ د مينې دې په زړه کې دی ساتلی

په خوبانو پسې سترگې گرزوې ته

د دلبرو قدر تا ښه پېژندلی

لاس او پښې د دلبرانو ښکلوې ته

د هر ښکلی څنگ ته ځان تا رسولی

د خوبانو غېږ کې ځان تا اچولی

نيمه شپه يې د قبلې خواته روانه

ته دخدای دکور ډيوه يې نوراني

ستا رڼا ده په هر چا باندې يکسانه

ستا له فيضه لري برخه زنداني

محوه کړی دې تياره ده له جهانه

لوړ مقام دی خدای در کړی آسمانی

نور ويده دی ته يې ټوله شپه بيداره

ستا ډيوه وينمه بله تر سهاره

خوشحال خان ستا په رڼا کې گرزېدلی

د پښتون د ننگ د پاره غرور رغو کې

احمد شاه شېرشاه ميرويس دې هم ليدلی

د وطن دننگ ناموس لويو جگړو کې

تر ايران او تر ډېلی دی رسېدلی

د پښتون د تورې برېښ په ځليدوکې

غزاگانې تا ليدلی د پښتون دی

تا ليدلی فسادونه دگر دون دی

وريدلی چې په دې غرونو ږلۍ دی

بهېدلی پکې خړخړ سېلابونه

راالوتی چې په دی وطن سيلۍ دی

تا ليدلی دلته هر راز طوفانونه

لاهماغسې ولاړې زمونږ کېږدۍ دی

نه مړه کېږي په هېڅ شان زمونږ اورونه

تا زمونږ په شان ليدلی کوم ټبر دی

مونږ مات کړی دلته سد د سکندر دی

ستا رڼا کې پيدا کېږي نور فکرونه

شاعران اخلی له تا ځنې الهام

په کتو کې درته وايې پټ رازونه

يار اشنا ته لېږي ستا په لاس سلام

تا سره وينمه بل راز تاثيرونه

ته په هره شپه راوړې نوی پيغام

په تا باندې د اشنا مينه ماتېږي

د دردمنو تسلي درباندې کېږي