سرو صورت یوازې مه ګوره معنا وګوره

په سرکې فکر زړه کې پټه مدعا وګوره

وینا یې واوره بیا یې وګوره عمل ورسره

میل و رغبت  غایه هدف  او تمنا وګوره

په اشنایانو  او ملګرو کې یې فکر  کوه

په غور غور یې بیا  ذوق  و اشتها وګوره

څه وایي څه کوي  او څه غواړي دڅه دپاره ؟

ورته په  ځیر ځیر له هر لوري هری خوا وګوره

نن دې چې ولیده یوازی او له نورو سره

په یو ځل مګړه قناعت سبا یې بیا وګوره

مه وایه دا چې نور یې نه ګورم لیدلې مې دی

بیا په دقت دده تمامه مشغولا وګوره

ورپسې پټ پټ څار کوه څه پټوي څه ښې؟

دده په کار کې دده غلا دده ریا وګوره

تاثیر یې څنګه دی په نورو په ده څه تاثیر دی؟

دده طاقت او دده ټوله کمزور تیا وګوره

په خطراتو سختو ورځو کې به څه رنګه وي

استقامت او حوصله د خپل اشنا وګوره