سترگې دې شوې ښکته، ښکته پاتې د پيغامه پس

سترگې دې شوې ښکته، ښکته پاتې د پيغامه پس

بويه څه جواب خو د قاصد له احترامه پس

شان د خپل ديدن د خدای ديدن ته ورنزدې کړو تا

فکر مې کعبې ته منتقل شو ستا له بامه پس

ډېر چې درنه کېږي، دازما به ولې تش درومي

نورمې دی اشنا درته سلام له دې سلامه پس

اوس دتا د مخ نه د کاکل راښکنه زياته ده

کفر غلبه راباندې راوړه له اسلامه پس

خير دی وو رټل، خو چې رقيب وته موسکۍ شولې

دا دويم انعام دې در واپس دی له انعامه پس

بې جلبه بېرته ستنېدل هم څه پښتو نه ده

ستون شو د مېلمه نه د درشل سره دوه گامه پس

تش دې راته راکړو خو له هر څه نه يې ډک گڼم

جام د جم شو هېڅ راته ساقي د تا له جامه پس

دام د تا دزلفو، د هر يو بنده آزاد کړمه

نور دامونه واړه شو بې کاره ستا له دامه پس

پام کوه حمزه چې د توبې زړه دې ازار نه شي

کښېږده پرې مرهم د پسرلي له اختتامه پس