څه دی؟

سترگې غړولی نشم دوړې او گردونه دی

يوقدم د مخه نشم تلی لوی گړنگونه دي

ښه ښکاری له لرې ورروان په ډېره مينه شم

ښه چې ورنژدې شم پکښې سل رنگه عيبونه دي

ما غوندې يې ډېر په خبرو تېرايستلی دي

ډېر يې په ښه ژبه باندې کړی بدکارونه دی

زړه کښې يې د خير او د صلاح فکرونه گرځي

لوستی يې که نسوی او زاړه ډېر کتابونه دی

وايي په مجلس کښې اياتونه حديثونه ډېر

هر وخت په دې چل خوړلی ده پردی مالونه دی

تل کوي دعوه د پاک نفسی اود خدمت د قوم

چاچې په هر کار کښې ډېر اخستی رشوتونه دی

څنگه به روان په سمه لاره هغه خلق شي

مونږ چې د دوی کړی په بدکار تل صفتونه دی

وايو ښه ملا دی څوک يې نشته دجواچېرې

ده په مسئلو ناحقه کړی ډېره حقونه دی

ښه ميرزا هغه دی د عالم په اصطلاح کښې نن

تل يې چې کارونو کې پېښ کړی جنجالونه دی

څو چې زړه کښې مينه عاطفه د خير پيدا نه شي

علم و لياقت کښې هم نقصان او ضررونه دی

سمه نيمه شپه ده سودايي له خوبه پاڅېدم

ځکه مې گډوډ او پرېشان دغه شعرونه دی

اوس يې که څوک نه لولی عالم په خوب ويده دی ټول

دا د سبا ورځي ويښ ځلموته پيغامونه دی