وليکه قلمه يوغزل ښه جانانه

وليکه قلمه يوغزل ښه جانانه

پرېږده چې وييږي دا دوه ژبې زمانه

مينه د زلفانو بې له خاله پښېماني شي

نه ورتله تش دام ته وي چې نه لري دانه

پورته شه بيان په افسانه کې حقيقت کړه

بيا د حقيقت نه راښکاره کړه افسانه

ښکليه دا خو لا دې نښانه د پرېشانۍ ده

څو که دې کمڅۍ دجمعيت کړې بهانه

خوی چې د ساقي مې دريابي غوندې ښکارېږي

نن مې جوړ په کار شو لغزشونه مستانه

ما چې رانيوله تا راواړولې سترگې

لاړه ساقي لاړه په دې منځ کې پيمانه

حسن هغه يو دی که په هر محفل کې ښکاري

ځان چې غورځوي په هره شمع پروانه

يا خو دا خپل غږ راته پردی غوندې ښکاره شو

يا مې جنون وکړه ابتدا په ويرانه

شېخه د رښتيا ويل په خوند به هله پوه شې

ستا چې د حمزه غوندې مشرب شي رندانه