ورا مې راغلی دی خو وار کومه

ورا مې راغلی دی خو وار کومه

څنگه کارونه د هوښيار کومه

لوړې ژورې څه معنی نه لري

زه چې د سيند غوندې رفتار کومه

ښکليه زما په انتظار مه اوسه

زه لا وزگار نه يمه کار کومه

ستا د راتگ خبرې پس ته به وي

زه لا خپل ځانته انتظار کومه

دا برکت د بې لارۍ دی زما

چې په بې لاره کې هم لار کومه

پخپله څو ځله ښکار شوی يمه

اوس خطا کېږي نه چې ښکار کومه

په ټال د زلفو زنگېدلی يمه

اوس به له داره ولې ډار کومه

درته موقع د بې لوظۍ در کوم

چې په وعده دې اعتبار کومه

حمزه غزل مې بې اختياره ووې

ولې ليک يې په اختيار کومه