زه شوم آيينه چې گورم ستا په لور

زه شوم آيينه چې گورم ستا په لور

خير که اوس نظر نه کړې زما په لور

ته رټل شړل کړه زه وفا کوم

سترگې خو دسپي وي د آقا په لور

شوچې سپوږمۍ مخيه مې نظر په تا

نه کړمه نظر د توتيا په لور

گوره مې همت چې ستا طلب کوم

پورته مې قدم د کبريا په لور

سترگو ته زما تورې تيرې ووې

تور به مو سپين سپين شي د سبا په لور

پرانيزه لبان چې زه رنځور يمه

بېڅه اشاره کړې د دوا په لور

لور دې دهجران کړې دوه ټوټې زما

گوري ما له رشکه نن زما په لور

زه حمزه د زړه له کوره تلی يم

يم لکه چې غږ وي د صحرا په لور