زما کار

چې تور اور بل په سپين مخ ووينم غزل جوړوم

بل کار مې نشته شهلا سترگو ته کجل جوړوم

بکره معنی ښکلی کومه د هنر په سينگار

د ذوق ليلی ته د ښکلاو تاج محل جوړوم

تورې تيارې چې ورکې کړم د حقيقت له مخې

له عشقه اوراخلم له ځانه روڼ مشعل جوړوم

چې افسانه شمه په عشق کې زمانونه يادگار

لکه مجنون ځان نه د عشق ضرب المثل جوړوم

چې د چا خيال خاطر کښې هېڅکله ونه گرزمه

چې په درشل کښې دې شم خاورې ځان نه شل جوړوم

وصال دې نه غواړم پټ نه درځم په توره شپه کښې

د عشق په کار کښې زه له ځانه کله غل جوړوم

که زه دې خيال کښې نه يم ته خو زما خيال کښې يې تل

هره شېبه دې خط و خال څڼې اربل جوړوم

چې نظرونه پکښې بند شي له نظره نشي

لوگی کوم درته ځان زلفې دې ولول جوړوم

د سترگو تور به دې شم زه که دې زما په سترگو

خپل جمال وليد چې يې څومره مجلل جوړوم

وايي د شعر رب النوع د الفت په ژبه

سياسي لوبوته نه شعر ته اجمل جوړوم

چې پکښې مينه او ښکلا فکر او خيال کړی نجومی

د الفت بيت کښې د معنی رنگين محفل جوړوم