زما خوب

وربل يې ما په خوب کښې پرېشان ليدلی دی

ستا بخت خو مې رقيبه دغه شان ليدلی دی

د گلوهار په غاړه محبوبا شوه راحضوره

بلبله دا وطن مې گلستان ليدلی دی

کارغان به پکښې نه وي بلبلان به پکښې وي

باغونه به سمسوروي ما باغبان ليدلی دی

دا توره شپه به خدای کاندی په مونږ باندې سبا

سپين مخ مې چې سبا غوندې روښان ليدلی دی

تعبير يې کړي ما په ظالمانو به چپه شي

چپه کاکل مې خوب کښې د جانان ليدلی دی

مهاربه دې په پوزه شي د سروزرو خاونده

په سروشونډو دپاسه مې پېزوان ليدلی دی

زه پټې سترگې نه يمه په هر څه اوس پوهېږم

په خلاصو سترگو باندې ماجهان ليدلی دی

عمل چې وي ازاد او انتقاد پکښې بندي وي

ما هلته د ظلمونو سخت طوفان ليدلی دی

له دامه که دې خلاص کړم په قفس کښې دې ايسار کړم

صياده! ما خو څو رنگه زندان ليدلی دی

که هر يورانه وژني خيال او فکر مې وژنه

په دې کښې مې وطن ته لوی تاوان ليدلی دی