زړه مې اشنا شو ستا د سترگو د مېخواره سره

زړه مې اشنا شو ستا د سترگو د مېخواره سره

د لېونو ياري کېدی شي د هوښياره سره؟

اوس دې معيار د خودبينۍ شو مکمل شايد

مشت و گرېوان دې چې ښايست دی د سينگاره سره

په پسرلي کې به درک د گلرخانو لگي

مين که جوړه اشنايي کړي د مالياره سره

کوله مونږه چې پرده، پرده په مېنځ کې نه وه

اوس که پرده نشته پرده شوه د اظهاره سره

هم په دې تندر به مې شپې د انتظار وي روڼي

دا تبسم دې چې شامل کړو د انکاره سره

خوري حقيقت د سړيتوب په سمندر کې غوپې

گوره سړی دی د مجاز د کشت و کاره سره

گلونه تېر شي خو لا برخه د اغزو پاتې وي

چې سينې مږې بلبلان د هره خاره سره

ته که ماشوم يې په معنی نو زړه زانگو دی زما

راشي قرار د بې قرار د بې قراره سره

کمی د عشق هله پوره شي چې ستم وزغمي

کمی د حسن پوره کېږي د پنداره سره

د ځنکدن يې نه و حال چې بې کړې سترگې کوزې

ځکه اشنا نه شو ډېر پاتې د بيماره سره

واگي د زړه راکړې اشنا په يو ناجاڼه نظر

رقيب دې خوښ وي د خپل زور او د اختياره سره

سحر زما په تور بختۍ باندې گرېوان کړو څيرې

ډيوه مې سر شوه په سلگو د انتظاره سره

ښه ده حمزه چې په پښتون کې ځان ځاني شوه خوره

شي ضرورت دجمعيت د انتشاره سره