په یوه مینه تمام عمر لوګېدلی ژوندون

بله ډیوه تر سپين سحره سوزېدلی ژوندون

په کومه مینه، کوم سرور،کوم لېونتوب کې تېر شو

لکه ډیوه په تورو شپو کې بلېدلی ژوندون

دلته زخمی، هلته ستی، دلته زنځیر، هلته دار

څومره مصروف وو دا زموږه زوریدلی ژوندون

لکه غوټۍ د ازغو منځ کې په خندا سحرته

داسې تېريږی د یارانو غم لړلی ژوندون

ازغو د زړه په سر سوری کړو، ګل فروشو خرڅ کړو

لکه ګلاب وه دا زموږه غوړېدلی ژوندون

خټک د خوب غوندې د مینې په ځانګو کې تېر کړو

په انتظار کې تر سکېدلی، کړېدلی ژوندون