په زړه کې مې لمبې وې په لمبو کې بهارونه

موسکو شونډو دې لا پکې پیداکړه قیامتونه

زخمونو نه دخوُږ زړه ورته غیږې جوړومه

په ډیره موده پس مې  میلمانه دي ستا یادونه

زما دا ملنګي دژوندون لویه سرمایه ده

سپرلی سپرلی بانې  دجانان ګل ګل قسمونه

حیران یم ځان مې څه شو چې مې ځای په  ځان کې نه کړه

غضب غضب کاته دیار  غزل غزل شکونه

مستي  پکې دمینې دطوفان کله ختمیږي

ښایست یې د رڼا دپلوشو سمندرونه

ځواني غواړم ،سپرلی غواړم ، یو داسې اختر غواړم

موسم چې چیرته ویشي په ټالونو کې جامونه

محبوبې دزړه کلې مې پرې خدای شته چې رڼا ده

ډیر ښه دې په سالو کې ښکاري خال خال مقیشونه

«سائله» مونږه تل دبیلتانه سندرې وایو

مونږ تل  په پال نیولي دمرغانو اوازونه