چې هر چا ليدلی نه وي يار زما

چې هر چا ليدلی نه وي يار زما

خير دی دا که وايي بد په کار زما

هر هغه چې وي دلبر زما ليدلی

نه به کا ان شاء الله انکار زما

سر زما در گاه د هغه يار عزيز

بې له دې لار نشته بله لار زما

ما بې عشقه بل څه څيز زده کړی نه دی

چې څه دی هم دادی واړه کار زما

خدای دې يو له بله هېڅوک آزار نه کا

ای دلبره ماخله ته آزار زما

ياره ستا په جدايۍ او په ډېر غم کې

سيند د اوښکو درومي په رخسار زما

لوی او هلک واړه ستا خبرې کاندي

بل گفتگو نشته په ديار زما

زه رحمان به لاف په عشق کې څه وهمه

خود به ځان څرگند کا انتظار زما