ګوره هسې کردګار دی رب زما

ګوره هسې کردګار دی رب زما

چې صاحب د کل اختیار دی رب زما

همګي بزرګواران چې څوک یې وایي

تر همه وو بزرګوار دی رب زما

نه یې هیڅ حاجت په چا باندې موقوف دی

نه د هیچا منت بار دی رب زما

خواننده د نانویسو صحیفو دی

داننده د هر اسرار دی رب زما

هسې نه چې واحدي یې ده له عجزه

په واحد وجود بسیار دی رب زما

څه حاجت دی چې یې بله خوا ته غواړم

په خپل کور کې همکنار دی رب زما

هیڅ تغییر و تبدیل نه لري رحمانه

تل تر تله برقرار دی رب زما