د درگاه سپي

د صاحب د درگاه سپی

د غريب کاله سړی

په نظر کښې يو شان نه دي

يو يې خپل دی بل پر دی

د جناب په نامه ياد دی

د ليلی د کوڅی سپی

جناب نه دی هر سړی

که مزدور شي د صاحب څوک

له هرچا نه وي بې قدره

که څوک ځان ورته سپی کاندی

د صاحب پرې خاص نظر وي

سړيتوب ساتل گناه ده

په حضور کښې دبادار

په نظر د استثمار

هغه سپی چې صاحب کور کښې

په نعمت او ناز ساتلی

يو سړی د سپی خدمت ته

بودجه کښې منظور شوی

نورو سپيو غوندې نه دی

له مزدوره معتبر دی

د صاحب چې پرې نظر دی

صاحب وايي زما سپي ته

دسړی په نظر گورئ

په ادب کښې يې هېڅکله

له انسان نه کم مه بولئ

اودس نه ماتوي کورکښې

ځي د باندې چيرته لرې

چې يې نکړئ چغه کورې

له دهقانه يې ژوند ښه دی

په صابون مينځلی کېږي

ډېر خواران او غريبان يې

ژوندانه ته هوسېږي

لکه سپي د يو رپيانو

لکه سپي

نازوي يې بي بي جا نه

چې په سپي ده مهربانه

د سپي دا قدر چې وليد

بې همته ومانه سپيتوب

د دنيا د صاحبانو

سړي سپي شوه سپي سړي شوه

د صاحب له برکته

او زمونږ له دون همته

که انسان استخدامېږي

عملاً د سپي خدمت ته

دقانون نظر خوښه دی

د انسان لوړ کرامت ته

حقوق واړه مساوي دي

د بډای او د فقير

د صاحب او د حقير