دا سرې غمجنې سترگې خو جلوت دی د ارمان

دا سرې غمجنې سترگې خو جلوت دی د ارمان

پرسان د زړه يې مه کړه چې خلوت دی د ارمان

ماشوم چې وي په مم دتصور هم شي پخلا

توبه توبه شباب خو قيامت دی دارمان

دا خوی دی دهوس چې په طلب وي د وصال

حاصل د محبت خو محبت دی دارمان

زړگيه ځان چې ژغورې د رقيب له ناکردو

راغلی دې ښکارېږي چې شامت دی دارمان

بېلتون مې که پرېشانه شېرازه کړي دشعور

بيا بيا چې شي راجمع کرامت دی د ارمان

ارمان مې مطمين دی چې به نه شي ځوانيمرگ

چې ښکليه ستا په زړه هم حکومت دی دارمان

زاهد هسې عبث د ناکامۍ کړي شکايت

اگاه نه شو دې لار کې ضرورت دی دارمان

پيدا پکې ورو ورو به شي ستا خوی دتغافل

چې ستا له تصور سره صحبت دی د ارمان

حمزه په دې نقطه کې شي فنا همه لمحې

بس کيف خو له يو آنه عبادت دی دارمان