د تن غړي

په وجود چي مي لوى خداى وو پوري کړي

سترګي، خوله ، پښې ، لاس ، غوږونه او نور غړي

دا هر يو زما نوکر، زما غلام و

په چوپړ زما به بوخت سهار ماښام و

دغه هر نوکر په ما څکل خوندونه

دغه هر غلام په ما خوړل قندونه

په دنيا کي که هر نور و که هر رنګ و

په دنيا کي که هر ساز و که هر شرنګ و

په دنيا کي که هر ډول خوشبويي وه

په دنيا کي که خواږه و که ښادي وه

چي زما به پکښي کوم يو شى په کار سو

هر يو غړى د بدن به مي تيار سو

چي را وا يې چوي ما ته په لمن کي

وم خوشحاله په دا هسي انجمن کي

چي تمام غړي يې وو زما دپاره

مخ يې نه اړاوه هيڅ زما له کاره

که به زه ومه خوشحاله دوى خوشحال وو

که به زه وم په زوال ، دوى په زوال وو

له ما نه سول په يوه حال کي هم ستړي

سترګي، خوله ، پښې ، لاس ، غوږونه او نور غړي

سترګي ، خوله ، پښې ، لاس ، غوږونه او نور غړي

وو دا هسي نوکران چي خداى را کړي

ورو ورو واړه پر خپل وخت باندي زاړه سول

چي زاړه سول نو عجبه سخت درانه سول

چي درانه سول نو زما د اوږو بار سول

درواغ نه وايم ، رښتيا د اوږو بار سول

تر دې بار لاندي مي ملا ولاړه کږه سوه

تر دې بار لاندي مي سا لکه اره سوه

تېرېده را تېرېده مي پر خپل ستوني

په بيا بيا حلالېدمه په ژونددوني

کشاوه مي دغه بار تر خپله وسه

خبر نه ومه له داسي يوه کسه

چي بېرېږي لږ او ډېر له خپله خدايه

دا زما درانه هډوکي تر څه ځايه

پر وږه راسره واخلي د ګور خوا ته

تر سرحد ما واړوي بلي خوا ته

دغه حال ګوره و چا " مرګي " ته وړى

هغه و دومره همت را سره کړى

بل جهان ته يې له ما سره وو وړي

سترګي، خوله ، پښې ، لاس ، غوږونه او نور غړي

سترګي ، خوله ، پښې ، لاس ، غوږونه او نور غړي

په خوارۍ ما بل جهان ته وو راوړي

په دې ځاى کي دا ټول ما ته په بل شان سول

نوکران وو اوس سپين سترګي دښمنان سول

دا سپين سترګي دښمنان دې ته تيار سول

ټول د حشر پر ميدان دې ته تيار سول

چي زما پر خلاف هر يو خپل ځاى ګواه کړي

د خداى مخ ته مي بيان هره ګناه کړي

بيا چي وسوه اجازه ور ته له خدايه

نو راپورته به سو يو له خپله ځايه

او ويل به يې په ما يې کړې غلا ده

هغه بل به ويل ، بده خو لا دا ده

ده په ما باندي ځبېښلې پرندۍ شونډي

بل به وې ، په ما يې حق وخوړ د کونډي

په دې توګه چي ما څونه بد وو کړي

دوى ميدان ته وو د حشر ټول راوړي

غټ يې درمن دلته ډېر د قاف تر غره سو

اوس نو فضل که د خداى چرته و نه سو

سره دوزخ ته به دوى هم راسره رغړي

سترګي، خوله ، پښې ، لاس ، غوږونه او نور غړي