دلبر او ستمگر

عناد په زړه کښې توره لاس کښې کبر سر کښې لري

کبرجن کله رحم زړه کښې زړه ځيگر کښې لري

د شکنجو د ځورولو رنځولو کار کښې

ډېر عذابونه ډېرو خلکو ته نظر کښې لري

پټي عقدي د ظالم تريو تندي کښې غوټه ښکاري

خوله يې هم سپی ده او خروړي سپي په در کښې لري

زور د دنيا که د ښکلاوي په هر رنگ کښې چې وي

کبر غرور په ستمگر او په دلبر کښې لري

ښکلي لري دولت د حسن سرمايه د غرور

ظلم و ستم وسله په کور د توانگر کښې لري

زلفې ماران که دلبران لري مينو لره

تور مار دمار د زهر و آب تېره حنجر کښې لري

که د چا زړه دلبر وي وړی او دلبر سره وي

نشته پروا که دلربا په بر کښې لري

سياستونه ضد په ضد کښې پټوي هر کله

ظلمت د ظلم، د احسان عدل په لمر کښې لري

د دقيانوس دوخت زاړه ارتجاعي فکرونه

نوو ځلمو ته په لباس د منور کښې لري