عشق په زړه کې مقام ونيو گريان تېر شو

عشق په زړه کې مقام ونيو گريان تېر شو

د وصال کعبه جوړېږي طوفان تېر شو

چې پخلا شو اشنا راغی ژړا لاړه

ورېځ ورکه نمر راوخوت باران تېر شو

د بېلتون غبار مې پنډ د زړه په لارو

قاصد نشته جرس، تت شو، کاروان تېر شو

ای قاصده دروغ وايې يا رکه باد و

دادی اوس زما د زړه په بوستان تېر شو

چې جنون دعشق نه عقل ماتې وکړه

که دا غم له گرانو گران و اسان تېر شو

حمزه مخ يې چې ښکاره کړ بيا يې پټ کړ

لکه برق چې دهستۍ په اسمان تېر شو