که بې ځايه زرکې نه وکښی آواز

که بې ځايه زرکې نه وکښی آواز

نه صياد ځنې خبر و نه شهباز

سکه له دې خبرې هسې معلومېږي

چې خپل صوت دی هر سړي لره غماز

د منصور و حال ته گوره حال يې څه شه

خدای دې فاش د هېچا نه کاندي پټ راز

درېغه درېغه که روستی عقل وړومبی وی

د انجام خبرې نه شي په اغاز

نېک عمل د عاملانو نېک فرزند دی

خدای څوک مه کړه شراب خور او قمار باز

چې فرزند يې شراب خوار او قمار باز شي

نور يې کاڼی شي د پلار په خونه ساز

خدای له هسې زاهوزاده امان وکړه

چې بې دين، بې ديانت شي، بې نماز

چې منکر پرې اعتراض کولی نه شي

دا دې شعر دی رحمانه که اعجاز