که صورت د محمد نه وی پيدا

که صورت د محمد نه وی پيدا

پيدا کړې به خدای نه وه د ا دنيا

کل جهان د محمد په مخ پيدا شه

محمد دی د تمام جهان آبا

نبوت په محمد باندې تمام شه

نشته پس له محمده انبيا

نور هاله د محمد و پيدا شوی

چې نه عرش و نه کرسي وه نه سما

بوی هاله د محمد و په جهان کې

چې بوی نه د آدم او د حوا

په صورت کې آخرين دی پيدا شوی

په معنی کې اولين دی تر هر چا

که نبي دی که ولي دی که عاصي دی

محمد دی د همه واړو پېشوا

چې يې دين د محمد دی قبول کړی

جنتي دی که فاسق دی که پارسا

محمد د گمراهانو رهنما دی

محمد دی د ړندو د لاس عصا

که رڼا ده پيروي د محمد ده

گڼه نشته په جهان بله رڼا

محمد د بې چاره وو چاره گر دی

محمد دی هر دردمند لره دوا

خدای يې مه گڼه بېشکه چې بنده دی

نور يې کل واړه صفات دي په رښتيا

زه رحمان د محمد د در خاکروب يم

که مې نه کا خدای له دې دره جدا