کرد گلو کړه چې سيمه دې گلزار شي

کرد گلو کړه چې سيمه دې گلزار شي

اغزي مه کړه په پښو کې به دې خار شي

ته چې بل په غشيو ولې هسې پوه شه

چې همدا شي به ستا په لور گوزار شي

کوهی مه کنه د بل سړي په لارکې

چرې ستا به د کوهي په غاړه لار شي

ته چې هرچاته په خوارو سترگو گورې

لا ړومبی به ستا صورت په خاورو خوار شي

آدم زاد په معنی واړه يو صورت دی

هر چې بل آزار وي هغه آزار شي

که ته نه کوې نظر د چا و عيب ته

هر سړی به ستا د عيبو پرده دار شي

دهقان کر په لوړه مځکه باندې نه کا

سرکوزي کړه چې پټی دې مرغزار شي

د مات لوښي آواز کله ثابت خېژي

د هر چا عمل څرگند په خپل گفتار شي

نن چې صبح ده روښانه لار صحيح کړه

ناگهانه به دا صبح شب تار شي

لږ يې مه گڼه که هرڅو گناه لږ وي

چې لږ لږ وبله جمع کړه بسيار شي

که بل بد کاندي ته ښه کړه مه رنځېږه

هر يونخل چې مېوه لري سنگسار شي

تل وښو وته آزار د بدو رسي

هر چينجی و نرم چوب وته دو څار شي

هغه زړه به له طوفانه په امان وي

چې کشتۍ غوندې دخلکو بار بردار شي

خدای دې بدد له لاسه مه کړه او که وي هم

د رحمان دې په کل بدو استغفار شي