نقاب

که يو ځل خلکو رشتيا وويله ـ

يو ځلي وسپړېدل پټ رازونه ـ

يو ځل رسوا سوې دروغجني ميني ـ

يو ځلي خلکو سره وکتله ـ

ويې ليدل ـ

تر نقابونو لاندي پټ مخونه ـ

او د دوستۍ په پوښ کي نغښتي ـ

شيطاني نيتونه ـ

هغه بېځايه، بې قيمته، بې ارزښته اوښکي ـ

هغه خيرني مکرجني خپلوۍ ـ

يو ځلي يو له بله وتورېدل، وتښتېدل ـ

او يا د قتل په نيت ووتل تېره تېغونه ـ

يا يې هم بل کړل د کسات او انتقام اورونه ـ

دلته به څوک اوسېږي ـ

څوک به ژوندي پاتېږي ـ

د مځکي مخ به ټوله ويني واخلي ـ

هر څه به وسوځېږي ـ

همدا نقاب دئ چي يې مخ د تباهۍ نيولى ـ

همدا نقاب دئ چي ژوندي مو ساتي ـ