په پښتنه وينه زرغون ښکاري

په پښتنه وينه زرغون ښکاري

چې په دې بڼ کې زړه راښکون ښکاري

د پښتونخوا په زړه کې ناست يمه زه

چې په رگ رگ کې مې ژوندون ښکاري

نن د پښتون نوي لېمه کړه پيدا

ورته سبا او هم پرون ښکاري

د مليت جنونه ځار دې شمه

چې هر افغان دې افلاطون ښکاري

جوړ په ماحول يې کړي موسکا د گلو

دا برکت د زړه چاودون ښکاري

د پښتنې فضا د ژوند نبضونه

توند او تاوده لکه پښتون ښکاري

لاس يې ورواچوو گرېوان ته د وخت

څومره هوښيار دغه مجنون ښکاري

راغلې له ستوريو نه موسکا شوکوي

خير زما اوښکې په شبخون ښکاري

نن لکه نن چې دی، پخوا به نه و

پکې سبا او هم پرون ښکاري

غږ د جرس رانزدې کېږي حمزه

زمونږ کاروان بېرته راستون ښکاري