پاتې نه شو سوز د محبت په پروانه کې

پاتې نه شو سوز د محبت په پروانه کې

شمع شوه گويا د خپل جمال په افسانه کې

سترگې د وختونو چې څه برندې غوندې ښکاري

څه فتور خو پېښ شو په مزاج د زمانه کې

مې خو هم هغه دي خو سرور ترې مرور دی

پاتې اسوېلي دي صراحي او پيمانه کې

نشته پېروزوينه يو تر بله د رندانو

غونډ سره همه دي هوښياران په ميخانه کې

مينه بازاري شوه که ښکلا زمانه سازه

ښکليه چې دې سم ښکاري دروغ په بهانه کې

ساز د زمانې جوړ د فطرت له واکه وووت

بې له غمه څه دي په نغمه په ترانه کې

داسې شور او زوږ چې ښاريه کې به هم نه وي

دلته شو له کومه راپيدا په ويرانه کې

زړه او داسې تش دمحبت له کيفيته!!

گويا باده ختمه شوه د کورو په دانه کې

اوس نو خرد چرته چې مستي له مېنځه لاړه

فرق نشته حمزه په فرزانه او ديوانه کې