قناعت راته عطا کړې زما ربه

قناعت راته عطا کړې زما ربه

ورک زما حرص و هوا کړې زما ربه

دا سرکښ نس مې سرکوزى کړې په صبر

راته ايله دا بلا کړې زما ربه

چې دې نوم په غوږو، واورم سره لمبه شم

هسې سوز را کې پيدا کړې زما ربه

چې مې نشي اضطراب د چا په ظلم

هومره صبر و سکون راکړې زما ربه

نور مې وساتې زبان له پوچ گويۍ

په خپل وصف مې گويا کړې زما ربه

دم قدم زما سيده لرې په شرع

له لغزشه مې نجا کړې زما ربه

که رضا د ستا د سر او په مال مومم

ژر مې سازه دا سودا کړې زما ربه

چې حضرت راوړى دين دى زما دين دى

که مې مړ په دا وينا کړي زما ربه

هرچې ستا، ستا د رسول پکې مرضي وي

هغه کار شغل زما کړې زما ربه

د رسول په پاک وجود مې ستا قسم دى

چې قبوله دا دعا کړې زما ربه

که حميد خطا دعا کا په غفلت کې

دا خطا دعا رسا کړې زما ربه