روږدی نه وم ستا د موسېدو سره

روږدی نه وم ستا د موسېدو سره

ړوند شومه د سترگو غړېدو سره

عشقه وصل پرېږده مړغېژن په شې

اور خو وي ژوندی د بلېدو سره

پرېږده چې سلگۍ مې شي اشنا پسې

دا خو شته د سترگو لگېدو سره

دا رد عمل له جفا پس وي تل

غريو ونيوم ستا د موسېدو سره

رنده تر لاله خو صبر بويه ته

خير شوې د اسمان د غرېدو سره

هسک مې شولو بخت د ثريا نه هم

ستا د ښکليو سترگو ټيټېدو سره

اوښکه زما، ستا په تصور وه شمع

نُور شو ترې رخصت د بهېدو سره

وکړه حمزه بيا د لېونتوب دعا

غم شولو در پېښ د رغېدو سره