هغه دم چې زړه ملال شي

هغه دم چې زړه ملال شي

يوساعت ورباندې کال شي

حيران تللی وي په فکر

فراموش يې قيل و قال شي

نه يې گفت نه يې شنود وي

په غوږ کوڼ په ژبه لال شي

نه خواب وچاته کاندي

نه يې غوږ دچا په سوال شي

علم عقل ځنې پاڅي!

درست صورت يې خواب و خيال شي

په رڼو سترگو ويده وي

لکه نقش د دېوال شي

قوت يې وينې د ځيگر شي

هم دغه يې اشتغال شي

د چشمانو له بارانه!

په رخسار يې پشکال شي

په سبب دا عاشقيه

تېر تر آل و تر عيال شي

هم تر آل وتر عياله

هم تر مال وتر منال شي

په خپل درد و په خپل غم کې

له عالمه فارغ بال شي

نه طاقت نه يې مجال وي

بې طاقت و بې مجال شي

که ژوندی وي په جهان کې

دمرده وو په مثال شي

په خشکۍ کې ماهي گوره

هسې بې تېغه حلال شي

پاڅېدی نه شي له ځايه

په زړه غورڅ په تن کهال شي

د ويشتليو په څېر يون کا

له کل خلکو په دنبال شي

لکه خس لوبې لارې!

تر قدم لاندې پايمال شي

خدای له غمه سړی ژغوره

بيا لا بويه چې خوشال شي

چې د زړه ولې شي غوڅې

نور ژوندون يې په اشکال شي

د باغيان سترگې کاسپينې

چې تازه نخل ونهال شي

روئيدن د کښت اسان دی

پرورش يې لوی جنجال شي

ويراني په يوه دم شي

وداني په ډېر اشکال شي

چې پلار و مري بيا لابويه

چې يې زويه په کمال شي

څوک خبر دی له دې دوره

چې زمان لره څه حال شي

چې په حال کې يې حال نه وي

څه اميد په استقبال شي

د يوه ساعت له مخه

خدای زده څه رنگ به احوال شي

ددنيا چارې فاني دي

رفت آمد يې په يرغال شي

په مثال لکه دسيوري

خوا وشا دهر دېوال شي

اعتماد په اوبو مه کړه

چې استاد به په غربال شي

د بڼؤ په ځمبول کې

شال شړۍ کا شړۍ شال شي

که بادشاه دولايت وي

کنډولی په لاس کنگال شي

په ثواب يې غلط مه شه

په يوه ساعت وبال شي

په کمال يې مه نازېږه!

په يوه گړۍ زوال شي

د هاتيانو سوداگر وي

گاو دلال و خر دلال شي

جوهري وي دجوهرو

خاورې اغږي کلال شي

کلالي او گل کاري کا

فروشنده دمات سفال شي

په هښتيه کې اشراف وي

په نېستيه کې ارزال شي

د ځوانيه په وخت شېر وي

د پېرۍ په وخت شغال شي

چې مشهور په صداقت وي

پوچ گويي واخلي بطال شي

محتسب وي احتساب کا

کوټوالي واخلي کوټوال شي

نېکو کار د نېک افعال وي

بد کردار و بد افعال شي

سرنوشت د سړي گوره

يو عيسی وي بل د جال شي

چې نېک بخت وي نېکويي کا

چې بدبخت وي بد سگال شي

لاس و پښې د هغه نيسه

چې خوش خويه خوش خصال شي

په هجران کې نومېد مه شه

خدای قادر دی که وصال شي

په حرامو اميد مه کړه

گوندې مخ دې په حلال شي

کافر وباسي له کفره

په يوه ساعت ابدال شي

تور بهتر کاندي تر سپينو

په سپين مخ د پاسه خال شي

آروزمند ديوه خس وي

خداوند د ملک ومال شي

چې سيالي يې کړې نه وي

له سيالانو سره سيال شي

چې په عمر مفصل وي

په ساعت کې اتصال شي

ممکنات به منع نه کا

که څوک سل ځله سمبال شي

چې دخدای رضا شي پېښه

رمل پاتې د رمال شي

فال به څه گورې رحمانه!

خپل افعال د سړي فال شي