آرزو

کشکي چي نه وای زما او ستا تر منځ

دا لوی - لوی غرونه

کشکي چي نه مو وای سيندونه او ښارونه تر منځ

يا مي وزر درلودای

او يا مي روح در استولی وای د خيال پر اوږو

يوې خبري لره

يوه پيغام دپاره

درسره مينه لرم هېر مي نه کې

دلته مي زړه ستا د خيالونو سره

هلته مي روح ستا د خوبونو سره

ملګری کړی وای

خو ته په خپله

د بې پروا ښکلي ماشومي په څېر

له هر څه هر څه بې خبره غوندي

زما د آرزو پر چمن ګرځېدلای

لاندي کولای دي نازکي غوټۍ

او هېرولای دي زخمي ګلونه