بندوبست د کاينات دی په خبرو

بندوبست د کاينات دی په خبرو

يو تر سله صدقه شه، سل تر زرو

د همت په بال و پر سړی الوځي

مرغه پورته الواته کا په وزرو

ورته وايه توره کښېږده ! په صندوق کې

هر سړی چې مېړنی وي په تلبرو

يا د سپينې تورې مرد شه! يا عاشق شه

چې يادېږې په بدلو، په سندرو

د عاشق برخه خواري، زاري ناندرۍ ده

دمعشوقې څه پروا له مرورو

له يوه دريابه خېږي، فرق يې ډېر دی

که نظر کړې د درياب په مرغلرو

چې يې غم د غليم نشته بختور دی

خدايه! ما کړې په شماره دبختورو

د خوشال خټک خوښي په هغه وخت وي

چې برېښنا د سپينو تورو شي، د زغرو