بيده خيالونه

هېر که ناآشنا بيده خيالونه هېر که

هېر که آشنا دا ويښ خوبونه هېر که

هغه چي ړنګي سولې ښخي سولې

د هغو هيلو لحدونه هېر که

خدای دئ که ترنګ مي له ربابه وځي

زړه مستي مي په نغمه کي نسته

خندا بيده سوه اوښکي ويښي سولې

د ځوانۍ جوش مي په سينه کي نسته

هغه چي وزمولېدې ورژېدې

هغه غوټۍ د يادولو نه دي

هغه چي زړونه رغولای نه سي

هغه نغمې د ږغولو نه دي

زه د خرمستو د سرکوب نيمه خوا

ته رانه اوس هم پايکوبونه غواړې

زه په ژوندوني ځوانيمرګ سوم دلته

ته مي په وينو کي اورونه غواړې

زه سره ابليس پر مخ وهلی يمه

زما څخه هېر سول فردوسي يادونه

زما څخه مه غواړه تاوده رګونه

زما څخه مه غواړه ياغي خيالونه