بېنوا ستا د رحمتونو له کماله سره

بېنوا ستا د رحمتونو له کماله سره

داطمينان وريځې راغلې ستا له کاله سره

ستا له جلاله مې چې سترگې د خودۍ شوې ټيټې

غاړه غړۍ مې شو نظر ستا له جماله سره

درته مارغان دي منتظر د بې قرارو زړونو

بېنوا راشه د رنگين نظر له جاله سره

زړگيه تانه به طواف کوي عالم د مثال

چې شوې اشنا شاه ستار له بې مثاله سره

څوک چې ختلی په رښتيا دی ستا د مينې په ټال

د جهان سترگې يې جلب کوي له ټاله سره

ته په خاطر د واقف شاه او مظفر خاونده

خپل التفات دې کړه شامل زما له حاله سره

اوس له ميخور نه دمسکين حمزه خبر اخله ډېر

وختونه ډېر دي مخالف له بې مجاله سره